Ministrja e Integrimit Europian, Dhurata Hoxha, ka konfirmuar për Express se Parlamenti Europian sot voton për liberalizimin e vizave për Kosovën.

Ministrja Hoxha ka thënë për Gazetën Express se votimi në Parlamentin Europian nis në orën 12:00 deri në orën 13:00 për shumë pika.

Edhe eurodeputetja dhe raportuesja për Kosovën në Parlamentin Evropian, Tanja Fajon është shprehur optimiste se sot Parlamenti Evropian do votojë në favor të Kosovës për liberalizimin e vizave.

“Parlamenti Evropian pritet të votojë në favor të heqjes së vizave për qytetarët e Kosovës”, ka shkruar ajo në Twitter.

Ministrja e Integrimit Europian, Dhurata Hoxha, gjithashtu potencoi se secili hap është më i vështirë tani se tjetri në rrugën drejt liberalizimit dhe integrimit europian.

“Duhet të presim sepse tani secili hap është më i vështirë se tjetri dhe më asgjë nuk është në dorën tonë”, tha Hoxha.

Hapat e mëtejmë, nëse votohet në Parlamentin Europian liberalizimi i vizave, Hoxha tregoi se janë disa hapa para se të arrihet në grupin punues, i cili do të formohet nga Komisioni, Parlamenti si dhe Këshilli. Ky grup punues është më 17 shtator.